《晚台》創台理念

「你傾我講，有來有往」

《晚台》成立嘅目的，係要支持開放、理性嘅討論。我哋相信真理越辯越明，只有尊重言論自由，保障唔同立場嘅人表達意見嘅機會，先可以透過辯論，為問題搵到答案。

《晚台》唔會因為政治正確、或要迎合主流而審查節目內容。只要係我哋真誠相信嘅諗法，無論係少眾嘅睇法，抑或係主流意見，都會攞嚟討論。係一個多元社會入面，我哋代表自己，亦為持相同諗法嘅人發聲，為我哋所支持嘅觀點出一分力。

我哋希望提供一個平台，可以俾唔同立場、唔同睇法嘅人都有發言嘅機會。只有辯論，先可以反證誰是誰非，同時亦提供一個機會，去反芻唔同嘅諗法，建構一套完善嘅論述。我哋相信討論要基於內心所信奉嘅原則同價值觀，講出真誠嘅睇法。

我哋想要透過同觀眾嘅互動，彼此交流內心最真誠嘅諗法。所有人都可以放開心胸表達自我，不被無形嘅主流壓力，以及政治正確所壓迫。我哋鼓勵思想嘅碰撞，引出各種可能性。